အရပ်သားအမျိုးသားလွှတ်တော် (အထက်လွှတ်တော်) ကိုယ်စားလှယ် (၁၆၈) ဦးစီ ရွေးချယ်တင်မြှောက်နိုင်ရန် ပြည်နယ်နှင့် တိုင်းဒေသကြီးများအလိုက် အမျိုးသားလွှတ်တော် မဲဆန္ဒနယ်များ စာရင်းကို ပြည်ထောင်စု ရွေးကောက်ပွဲကော်မရှင်က ထုတ် ပြန်လိုက်သည်။
အမျိုးသားလွှတ်တော် မဲဆန္ဒနယ်များအလိုက် နိုင်ငံရေးပါတီများနှင့် တသီးပုဂ္ဂလ ကိုယ်စားလှယ်လောင်းများမှ ပြည်နယ်၊ တိုင်းဒေသကြီး တခုစီအတွက် အထက်လွှတ်တော် အမတ် (၁၂) ဦးစီကို ယခု သတ်မှတ်လိုက်သည့် မဲဆန္ဒနယ်အလိုက် လူထုက ရွေးချယ်ပေးရမည်ဖြစ်သည်။
“ပြည်နယ် တိုင်းဒေသကြီး (၁၄) ခုက (၁၂) ယောက်စီလာမယ်။ အဲဒီ (၁၂) ယောက်ထဲမှာ ကိုယ်ပိုင်အုပ်ချုပ်ခွင့်ရ တိုင်းဒေသတွေက အမတ် (၁) ယောက်စီ ပေးခွင့်ရှိတယ်။ ပြည်နယ်တိုင်း ဒေသတခုစီကို အရပ်သားက ရွေးပေးရမှာ အမတ် (၁၂) ယောက်၊ စစ်တပ်က ဒီတိုင်း ထည့်မှာ (၄) ယောက်။ အဲတော့ ပြည်နယ်တိုင်း ဒေသတခုကို အမတ် (၁၆) ယောက်ရှိမယ်” ဟု ရွေးကောက်ပွဲ လေ့လာစောင့်ကြည့်သူတဦးက ပြောသည်။
ပြည်ထောင်စုလွှတ်တော် (အောက်လွှတ်တော်) မှ ဥပဒေကြမ်းများကို စိစစ်မည့် အမျိုးသားလွှတ်တော် (အထက်လွှတ်တော်) အတွက် ပြည်သူလူထုက အမတ်လောင်း (၁၆၈) ဦး ရွေးချယ်ရမည်ဖြစ်ပြီး စစ်ဦးစီးချုပ်က စစ်ဗိုလ် (၅၆) ဦးကို အမတ်အဖြစ် တိုက်ရိုက်ခန့်အပ်မည်ဖြစ်ရာ အထက်လွှတ်တော်အမတ် စုစုပေါင်း (၂၂၄) ဦး ရှိမည်ဖြစ်သည်။
၂၀၀၈ ဖွဲ့စည်းအုပ်ချုပ်ပုံ အခြေခံဥပဒေအရ နာဂ ကိုယ်ပိုင်အုပ်ချုပ်ခွင့်ရဒေသ (စစ်ကိုင်း)၊ ဓနု ကိုယ်ပိုင်အုပ်ချုပ်ခွင့်ရဒေသ (ရှမ်း)၊ ပအိုးဝ် ကိုယ်ပိုင်အုပ်ချုပ်ခွင့်ရဒေသ (ရှမ်း)၊ ပလောင် ကိုယ်ပိုင်အုပ်ချုပ်ခွင့်ရဒေသ (ရှမ်း)၊ ကိုးကန့် ကိုယ်ပိုင်အုပ်ချုပ်ခွင့်ရဒေသ (ရှမ်း)၊ ၀ ကိုယ်ပိုင်အုပ်ချုပ်ခွင့်ရ တိုင်း (ရှမ်း) တို့ကို အထက်လွှတ်တော် မဲဆန္ဒနယ်မြေ တခုစီအဖြစ် သတ်မှတ်ပေးပြီး ယင်းဒေသများမှ အထက်လွှတ်တော်အမတ် (၁) ဦးစီ ရွေးချယ်ပေးရမည်ဖြစ်သည်။
လွှတ်တော်ကိုယ်စားလှယ်လောင်း အမည်တင်သွင်းမှုကို ယခုလ သြဂုတ် (၁၆) ရက်မှ (၃၀) ရက်အတွင်း ပြည်ထောင်စုလွှတ်တော်သို့ တင်သွင်းရမည်ဖြစ်သည်။ ကိုယ်စားလှယ်လောင်းက အမည်စာရင်း တင်သွင်းမှုကို ပယ်ဖျက်လိုပါက စက်တင်ဘာ (၃) ရက်နေ့ နောက်ဆုံးထား ရုပ်သိမ်းနိုင်သည်ဟု ပြည်ထောင်စုရွေးကောက်ပွဲကော်မရှင်က ကြေညာသည်။
ပြည်ထောင်စုရွေးကောက်ပွဲကော်မရှင်က လွှတ်တော်ကိုယ်စားလှယ်လောင်းများကို လာမည့် စက်တင်ဘာ (၆) ရက်မှ (၁၀) ရက်အတွင်း အပြီးသတ်စိစစ်မည်ဖြစ်သည်။
ရွေးကောက်ပွဲတွင် လွှတ်တော်ကိုယ်စားလှယ်လောင်းအဖြစ် ၀င်ရောက်ယှဉ်ပြိုင်လိုသူများက ပြည်ထောင်စုရွေးကောက်ပွဲ ကော်မရှင်သို့ ငွေကျပ် (၅) သိန်းဖြင့် အမည်စာရင်း တင်သွင်းရမည်ဖြစ်သည်။
No comments:
Post a Comment